സ്മൃതിക്കു പിന്നാലെ ജെമീമയും വിഡ ബ്രാന്‍ഡ് അംബാസഡര്‍

യുവ തലമുറയുമായി മികച്ച ബന്ധം സ്ഥാപിക്കുന്നതിനുള്ള ഹീറോ മോട്ടോകോര്‍പ്പിന്റെ നീക്കത്തിന്റെ ഭാഗമായാണ് നിയമനം

യുവ ഉപയോക്താക്കളിലേക്ക് കൂടുതല്‍ അടുക്കുകയാണ് ലക്ഷ്യം

സ്മൃതി മന്ദാനയുടെയും ജെമീമ റോഡ്രിഗസിന്റെയും സാന്നിധ്യം ഹീറോ വിഡയുടെ ബ്രാന്‍ഡ് മൂല്യം കൂടുതല്‍ ഉയര്‍ത്തുമെന്ന് കമ്പനി പ്രതീക്ഷിക്കുന്നു

ന്യൂഡല്‍ഹി: ഇന്ത്യന്‍ വനിതാ ക്രിക്കറ്റ് താരം ജെമീമ റോഡ്രിഗസിനെ ഇലക്ട്രിക് മൊബിലിറ്റി ബ്രാന്‍ഡായ വിഡയുടെ ബ്രാന്‍ഡ് അംബാസഡറായി ഹീറോ മോട്ടോകോര്‍പ്പ് നിയമിച്ചു. ടീം ക്യാപ്റ്റന്‍ സ്മൃതി മന്ദാനയ്ക്ക് പിന്നാലെയാണ് ജെമീമയും ബ്രാന്‍ഡിന്റെ മുഖമാകുന്നത്. ഈ വര്‍ഷം ജൂലൈയിലാണ് സ്മൃതി മന്ദാന ഹീറോ വിഡയുമായി സഹകരിച്ചു തുടങ്ങിയത്.

വനിതാ കായികരംഗവുമായുള്ള ബന്ധം കൂടുതല്‍ ശക്തമാക്കുന്നതിനും യുവ തലമുറയുമായി മികച്ച ബന്ധം സ്ഥാപിക്കുന്നതിനുമുള്ള ഹീറോ മോട്ടോകോര്‍പ്പിന്റെ നീക്കത്തിന്റെ ഭാഗമായാണ് പുതിയ നിയമനം. ഇന്ത്യന്‍ വനിതാ ക്രിക്കറ്റിലെ ശ്രദ്ധേയരായ രണ്ട് മിന്നും താരങ്ങളെ ബ്രാന്‍ഡ് അംബാസഡര്‍മാരാക്കുന്നതിലൂടെ യുവ ഉപയോക്താക്കളിലേക്ക് കൂടുതല്‍ അടുക്കാനാണ് കമ്പനി ലക്ഷ്യമിടുന്നത്.

ഇന്ത്യന്‍ വനിതാ ക്രിക്കറ്റിലെ ഏറ്റവും ശ്രദ്ധേയമായ താരങ്ങളില്‍ ഒരാളാണ് ജെമീമ റോഡ്രിഗസ്. 2025 ലെ വനിതാ ക്രിക്കറ്റ് ലോകകപ്പ് കിരീടം നേടിയ ഇന്ത്യന്‍ ടീമിന്റെ വിജയയാത്രയില്‍ നിര്‍ണായക പങ്ക് വഹിച്ച താരമാണ് ജെമീമ. ആക്രമണാത്മക ബാറ്റിംഗ് ശൈലി, ആത്മവിശ്വാസം, ഊര്‍ജസ്വലമായ വ്യക്തിത്വം എന്നിവയിലൂടെ യുവ ക്രിക്കറ്റ് ആരാധകരുടെ മനസ്സില്‍ ഇടം പിടിക്കാന്‍ താരത്തിന് കഴിഞ്ഞിട്ടുണ്ട്.

ഹീറോ മോട്ടോകോര്‍പ്പുമായി സഹകരിക്കാന്‍ കഴിയുന്നതില്‍ അഭിമാനവും സന്തോഷവുമുണ്ടെന്ന് ജെമീമ റോഡ്രിഗസ് പ്രതികരിച്ചു. ഇന്ത്യന്‍ കായിക താരങ്ങളെയും കായികരംഗത്തെയും പിന്തുണയ്ക്കുന്നതില്‍ ഹീറോ മോട്ടോകോര്‍പ്പ് തുടര്‍ച്ചയായി ശ്രദ്ധ പുലര്‍ത്തുന്നതായി താരം വ്യക്തമാക്കി.

ജെമീമയുടെ കായിക നേട്ടങ്ങളും വ്യക്തിത്വവും യുവ ഇന്ത്യയുടെ അഭിലാഷങ്ങളെയാണ് പ്രതിഫലിപ്പിക്കുന്നതെന്ന് ഹീറോ മോട്ടോകോര്‍പ്പ് എക്‌സിക്യൂട്ടീവ് വൈസ് പ്രസിഡന്റ് സഞ്ജയ് ഭാന്‍ പറഞ്ഞു. വനിതാ കായികരംഗത്തെ മികവിനെയും നേതൃ ഗുണങ്ങളെയും പ്രോത്സാഹിപ്പിക്കാനുള്ള കമ്പനിയുടെ പ്രതിബദ്ധതയാണ് ഈ പങ്കാളിത്തത്തിലൂടെ വ്യക്തമാകുന്നതെന്ന് അദ്ദേഹം കൂട്ടിച്ചേര്‍ത്തു.

പുതിയ സഹകരണത്തിന്റെ ഭാഗമായി വരാനിരിക്കുന്ന പരസ്യ ക്യാമ്പയിനുകള്‍, ഉല്‍പ്പന്ന അവതരണങ്ങള്‍, യുവജനങ്ങളുമായി ബന്ധപ്പെട്ട വിവിധ പരിപാടികള്‍ എന്നിവയില്‍ ജെമീമ പങ്കാളിയാകും. ഇന്ത്യന്‍ വനിതാ കായികതാരങ്ങള്‍ക്ക് പരസ്യ-വാണിജ്യ രംഗത്ത് വര്‍ധിച്ചുവരുന്ന സ്വീകാര്യതയുടെ പശ്ചാത്തലത്തില്‍ സ്മൃതി മന്ദാനയുടെയും ജെമീമ റോഡ്രിഗസിന്റെയും സാന്നിധ്യം ഹീറോ വിഡയുടെ ബ്രാന്‍ഡ് മൂല്യം കൂടുതല്‍ ഉയര്‍ത്തുമെന്ന് കമ്പനി പ്രതീക്ഷിക്കുന്നു.