സപ്ലൈ പങ്കാളികളുമായി സഹകരിച്ച് അനന്തപൂരില്‍ തന്നെയാണ് പുതിയ പ്ലാന്റ് സ്ഥാപിക്കുന്നത്
465 ഏക്കറില്‍ നിര്‍ദ്ദിഷ്ട പ്ലാന്റ് ഉയരും. ആന്ധ്ര സര്‍ക്കാരുമായി കിയ ഇന്ത്യ ധാരണാപത്രം ഒപ്പുവെച്ചു
പ്രതിവര്‍ഷം 2 ലക്ഷം വാഹനങ്ങള്‍ നിര്‍മിക്കാനുള്ള ശേഷി പുതിയ പ്ലാന്റിനുണ്ടാകും. ഇതോടെ ഇന്ത്യയില്‍ കിയയുടെ ആകെ വാര്‍ഷിക ഉല്‍പ്പാദന ശേഷി 6.3 ലക്ഷം യൂണിറ്റായി ഉയരും
2030 തുടക്കത്തില്‍ ഉല്‍പ്പാദനം ആരംഭിക്കും. ഏകദേശം 12,000 തൊഴിലവസരങ്ങള്‍ സൃഷ്ടിക്കപ്പെടും
രണ്ടാമത്തെ പ്ലാന്റ് കൂടി യാഥാര്‍ത്ഥ്യമാകുന്നതോടെ ഇന്ത്യയില്‍ കിയയുടെ ആകെ നിക്ഷേപം ഏകദേശം 5 ബില്യണ്‍ യുഎസ് ഡോളറായി ഉയരും
ന്യൂഡല്‍ഹി: ഇന്ത്യയിലെ ഉല്‍പ്പാദന പ്രവര്‍ത്തനങ്ങള്‍ വിപുലീകരിക്കുന്നതിന്റെ ഭാഗമായി രണ്ടാമത്തെ വാഹന നിര്‍മാണ പ്ലാന്റ് സ്ഥാപിക്കാന്‍ 2 ബില്യണ്‍ യുഎസ് ഡോളറിന്റെ നിക്ഷേപം പ്രഖ്യാപിച്ച് ദക്ഷിണ കൊറിയന്‍ വാഹന നിര്‍മാതാക്കളായ കിയ. ആന്ധ്രാപ്രദേശിലെ അനന്തപൂരില്‍ തന്നെയാണ് പുതിയ പ്ലാന്റ് സ്ഥാപിക്കാന്‍ കമ്പനി ഒരുങ്ങുന്നത്. സപ്ലൈ പങ്കാളികളുമായി സഹകരിച്ചായിരിക്കും പദ്ധതി നടപ്പാക്കുക. ഇതുമായി ബന്ധപ്പെട്ട് ആന്ധ്രാപ്രദേശ് സര്‍ക്കാരുമായി കിയ ഇന്ത്യ ധാരണാപത്രം ഒപ്പുവെച്ചു. സപ്ലൈ പങ്കാളികള്‍ക്കുള്ള സ്ഥലമുള്‍പ്പെടെ 465 ഏക്കറില്‍ നിര്‍ദ്ദിഷ്ട പ്ലാന്റ് ഉയരും.
പ്രതിവര്‍ഷം 2 ലക്ഷം വാഹനങ്ങള്‍ നിര്‍മിക്കാനുള്ള ശേഷി പുതിയ പ്ലാന്റിനുണ്ടാകും. നിലവിലെ പ്ലാന്റിന്റെ 4.3 ലക്ഷം യൂണിറ്റ് വാര്‍ഷിക ഉല്‍പ്പാദന ശേഷി കൂടി കണക്കിലെടുക്കുമ്പോള്‍ കിയയുടെ ഇന്ത്യയിലെ ആകെ വാര്‍ഷിക ഉല്‍പ്പാദന ശേഷി 6.3 ലക്ഷം യൂണിറ്റായി ഉയരും. 2030 തുടക്കത്തില്‍ പുതിയ പ്ലാന്റില്‍ ഉല്‍പ്പാദനം ആരംഭിക്കാനാണ് ലക്ഷ്യമിടുന്നത്.
ആന്തരിക ജ്വലന എന്‍ജിന്‍ (ഐസിഇ), ഇലക്ട്രിക് പവര്‍ട്രെയിനുകള്‍ ഉപയോഗിക്കുന്ന വാഹനങ്ങള്‍ എന്നിവ പുതിയ പ്ലാന്റില്‍ നിര്‍മിക്കും. ആഭ്യന്തര വിപണിയിലെയും കയറ്റുമതി വിപണികളിലെയും വര്‍ധിച്ചുവരുന്ന ആവശ്യകത നിറവേറ്റുന്നതിനും പുതിയ മോഡലുകള്‍ അവതരിപ്പിക്കുന്നതിനും ഈ പ്ലാന്റ് സഹായകമാകും. എന്നാല്‍ ഏതെല്ലാം മോഡലുകളായിരിക്കും പുതിയ പ്ലാന്റില്‍ നിര്‍മിക്കുകയെന്ന കാര്യം കമ്പനി വെളിപ്പെടുത്തിയിട്ടില്ല.
പുതിയ പദ്ധതിയിലൂടെ പ്രത്യക്ഷമായും പരോക്ഷമായും ഏകദേശം 12,000 തൊഴിലവസരങ്ങള്‍ സൃഷ്ടിക്കപ്പെടുമെന്നാണ് പ്രതീക്ഷിക്കുന്നത്. ഇത് പ്രദേശത്തെ വാഹന വ്യവസായ മേഖലയ്ക്കും സാമ്പത്തിക വളര്‍ച്ചയ്ക്കും വലിയ പിന്തുണയാകും.
2019 ല്‍ ഉല്‍പ്പാദനം ആരംഭിച്ച അനന്തപൂരിലെ നിലവിലുള്ള കിയ പ്ലാന്റിന് പ്രതിവര്‍ഷം 4.3 ലക്ഷം വാഹനങ്ങള്‍ നിര്‍മിക്കാനുള്ള ശേഷിയുണ്ട്. ഈ പ്ലാന്റിനായി കമ്പനിയും സപ്ലൈ പങ്കാളികളും ഇതിനകം ഏകദേശം 2.9 ബില്യണ്‍ യുഎസ് ഡോളറിന്റെ നിക്ഷേപം നടത്തിയിട്ടുണ്ട്. രണ്ടാമത്തെ പ്ലാന്റ് കൂടി യാഥാര്‍ത്ഥ്യമാകുന്നതോടെ ഇന്ത്യയില്‍ കിയയുടെ ആകെ നിക്ഷേപം ഏകദേശം 5 ബില്യണ്‍ യുഎസ് ഡോളറായി ഉയരും. കിയയുടെ ആഗോള വാഹന നിര്‍മാണ കേന്ദ്രമായി ഇന്ത്യയുടെ പ്രാധാന്യം വര്‍ധിക്കുന്നതിന്റെ സൂചന കൂടിയാണ് ഈ വന്‍ നിക്ഷേപം.