മോട്ടോക്രോസ് റേസിംഗിനായി പ്രത്യേകം വികസിപ്പിച്ചെടുത്തതാണ് ഡെസ്‌മോ450 MX ഫാക്ടറി. എന്‍ഡ്യൂറോ, ക്രോസ് കണ്‍ട്രി റൈഡിംഗ് മനസ്സില്‍ കണ്ടാണ് ഡെസ്‌മോ450 EDX രൂപകല്‍പ്പന ചെയ്തിരിക്കുന്നത്
ഡെസ്‌മോ450 EDX മോട്ടോര്‍സൈക്കിളിന് 18.55 ലക്ഷം രൂപയും ഡെസ്‌മോ450 MX ഫാക്ടറിക്ക് 21.26 ലക്ഷം രൂപയുമാണ് എക്‌സ് ഷോറൂം വില. രാജ്യമെങ്ങുമുള്ള ഡുകാറ്റി ഡീലര്‍ഷിപ്പുകളില്‍ ബുക്കിംഗ് ആരംഭിച്ചു
ന്യൂഡല്‍ഹി: ഇന്ത്യയില്‍ രണ്ട് ഓഫ് റോഡ് ബൈക്കുകള്‍ പുറത്തിറക്കി ഇറ്റാലിയന്‍ പ്രീമിയം ഇരുചക്ര വാഹന നിര്‍മാതാക്കളായ ഡുകാറ്റി. പുതിയ ഡെസ്‌മോ450 MX ഫാക്ടറി, ഡെസ്‌മോ450 EDX എന്നീ മോഡലുകളാണ് ഇന്ത്യന്‍ വിപണിയില്‍ അവതരിപ്പിച്ചത്. വ്യത്യസ്ത ഓഫ് റോഡ് ശേഷികള്‍ നല്‍കിയാണ് ഇരു മോട്ടോര്‍സൈക്കിളുകളും നിര്‍മിച്ചിരിക്കുന്നത്. മോട്ടോക്രോസ് റേസിംഗിനായി പ്രത്യേകം വികസിപ്പിച്ചെടുത്തതാണ് MX ഫാക്ടറി. എന്‍ഡ്യൂറോ, ക്രോസ് കണ്‍ട്രി റൈഡിംഗ് മനസ്സില്‍ കണ്ടാണ് EDX രൂപകല്‍പ്പന ചെയ്തിരിക്കുന്നത്.
ഡെസ്‌മോ450 EDX മോട്ടോര്‍സൈക്കിളിന് 18.55 ലക്ഷം രൂപയും ഡെസ്‌മോ450 MX ഫാക്ടറിക്ക് 21.26 ലക്ഷം രൂപയുമാണ് എക്‌സ് ഷോറൂം വില. രാജ്യമെങ്ങുമുള്ള ഡുകാറ്റി ഡീലര്‍ഷിപ്പുകളില്‍ ഇരു ബൈക്കുകളുടെയും ബുക്കിംഗ് ആരംഭിച്ചു.
449.6 സിസി, ലിക്വിഡ് കൂള്‍ഡ്, സിംഗിള്‍ സിലിണ്ടര്‍ എന്‍ജിനാണ് രണ്ട് ബൈക്കുകള്‍ക്കും കരുത്തേകുന്നത്. ഡുകാറ്റിയുടെ പ്രശസ്തമായ ഡെസ്‌മോഡ്രോമിക് വാല്‍വ് ടൈമിംഗ് സാങ്കേതികവിദ്യ എന്‍ജിന്റെ ഭാഗമാണ്. ഈ മോട്ടോര്‍ 9,400 ആര്‍പിഎമ്മില്‍ 63.5 ബിഎച്ച്പി കരുത്തും 7,500 ആര്‍പിഎമ്മില്‍ 53.5 എന്‍എം ടോര്‍ക്കും പുറപ്പെടുവിക്കും. ഡുകാറ്റി ട്രാക്ഷന്‍ കണ്‍ട്രോള്‍, ലോഞ്ച് കണ്‍ട്രോള്‍, എന്‍ജിന്‍ ബ്രേക്ക് കണ്‍ട്രോള്‍, ഡുകാറ്റി ക്വിക്ക് ഷിഫ്റ്റ് തുടങ്ങി നൂതന ഇലക്ട്രോണിക് സംവിധാനങ്ങള്‍ രണ്ട് മോഡലുകളിലും നല്‍കി.
പൂര്‍ണമായും ടൈറ്റാനിയത്തില്‍ തീര്‍ത്ത അക്രപോവിച്ച് എക്‌സോസ്റ്റ് സിസ്റ്റം കൂടാതെ, ഡാര്‍ക്ക് കഷീമ, ടൈറ്റാനിയം ഓക്‌സൈഡ് ട്രീറ്റ്‌മെന്റുകളോടെ പൂര്‍ണമായും ക്രമീകരിക്കാവുന്ന ഷോവ സസ്‌പെന്‍ഷന്‍, ബില്ലിറ്റ് അലുമിനിയം ട്രിപ്പിള്‍ ക്ലാമ്പുകള്‍, ഹോള്‍ഷോട്ട് ഡിവൈസ് എന്നിവ ഡെസ്‌മോ450 MX ഫാക്ടറിയില്‍ നല്‍കിയിരിക്കുന്നു. ഇന്ധനം നിറയ്ക്കാതെയുള്ള ഭാരം 104 കിലോഗ്രാമാണ്. 7.2 ലിറ്ററാണ് ടാങ്കിന്റെ ശേഷി.
അതേസമയം, എന്‍ഡ്യൂറോ, ക്രോസ് കണ്‍ട്രി മത്സരങ്ങള്‍ ലക്ഷ്യമിട്ടാണ് ഡെസ്‌മോ450 EDX ഒരുക്കിയിരിക്കുന്നത്. 8.5 ലിറ്റര്‍ ഇന്ധന ടാങ്ക്, പിന്നില്‍ 18 ഇഞ്ച് ചക്രം, പിറെല്ലി സ്‌കോര്‍പിയോണ്‍ XC മിഡ്-സോഫ്റ്റ് ടയറുകള്‍, ഓഫ് റോഡുകള്‍ക്ക് അനുയോജ്യമായ സസ്‌പെന്‍ഷന്‍ ക്രമീകരണങ്ങള്‍ എന്നിവ ലഭിച്ചു. ഹാന്‍ഡ് ഗാര്‍ഡുകള്‍, എന്‍ജിന്‍ സ്‌കിഡ് പ്ലേറ്റ്, സൈഡ് സ്റ്റാന്‍ഡ് എന്നിവയും നല്‍കി. ഇന്ധനം കൂടാതെയുള്ള ഭാരം 107.1 കിലോഗ്രാമാണ്.
രണ്ട് പുതിയ മോട്ടോര്‍സൈക്കിളുകളുടെയും അവതരണത്തോടെ ഇന്ത്യയിലെ സ്‌പെഷ്യലിസ്റ്റ് ഓഫ് റോഡ് മോട്ടോര്‍സൈക്കിള്‍ സെഗ്മെന്റില്‍ സാന്നിധ്യം ശക്തമാക്കുകയാണ് ഡുകാറ്റി. മോട്ടോക്രോസ്, എന്‍ഡ്യൂറോ മെഷീനുകളില്‍ മികച്ച പെര്‍ഫോമന്‍സ് ആഗ്രഹിക്കുന്നവര്‍ക്ക് തങ്ങളുടെ റേസിംഗ് സാങ്കേതികവിദ്യയും എന്‍ജിനീയറിംഗ് മികവും പരിശോധിക്കാന്‍ പുതിയ മോഡലുകളിലൂടെ ഇറ്റാലിയന്‍ കമ്പനി അവസരമൊരുക്കുകയാണ്.