ടിഎഫ്ടി ഡിസ്പ്ലേയോടുകൂടിയ പുതിയ ടോപ് സ്‌പെക് വേരിയന്റിന് 1,16,250 രൂപയാണ് എക്സ് ഷോറൂം വില
4.2 ഇഞ്ച് കളര്‍ ടിഎഫ്ടി ഇന്‍സ്ട്രുമെന്റ് ഡിസ്പ്ലേയാണ് 125 സിസി സ്പോര്ട്ടി മോട്ടോര്‍സൈക്കിളിന്റെ പ്രധാന ആകര്‍ഷണം
ബ്ലൂടൂത്ത് കണക്റ്റിവിറ്റിയോടൊപ്പം ടേണ്‍-ബൈ-ടേണ്‍ നാവിഗേഷന്‍, ഇന്‍കമിംഗ് കോള്‍, എസ്എംഎസ് അലര്‍ട്ടുകള്‍, മ്യൂസിക് കണ്‍ട്രോള്‍ തുടങ്ങി സ്മാര്‍ട്ട്ഫോണ്‍ ലിങ്ക്ഡ് ഫംഗ്ഷനുകള്‍ ഈ സ്‌ക്രീന്‍ സപ്പോര്‍ട്ട് ചെയ്യും
ടിപിഎംഎസ് മറ്റൊരു പ്രധാന സവിശേഷതയാണ്
പേള്‍ റെഡ് ആക്‌സന്റുകള്‍ സഹിതം മിഡ്‌നൈറ്റ് ബ്ലാക്ക് ഫിനിഷിലാണ് ഹീറോ എക്സ്ട്രീം 125R സ്റ്റെല്‍ത്ത് എഡിഷന്‍ വരുന്നത്
ന്യൂഡല്‍ഹി: ഇന്ത്യന്‍ വിപണിയിലെ 125 സിസി സ്പോര്ട്ടി മോട്ടോര്‍സൈക്കിള്‍ ശ്രേണി വിപുലീകരിച്ച് ഹീറോ മോട്ടോകോര്‍പ്പ്. എക്സ്ട്രീം 125R സ്റ്റെല്‍ത്ത് എഡിഷനാണ് പുതുതായി അവതരിപ്പിച്ചത്. ടിഎഫ്ടി ഡിസ്പ്ലേയോടുകൂടിയ ഈ പുതിയ ടോപ് സ്‌പെക് വേരിയന്റിന് 1,16,250 രൂപയാണ് ഇന്ത്യാ എക്സ് ഷോറൂം വില.
4.2 ഇഞ്ച് കളര്‍ ടിഎഫ്ടി ഇന്‍സ്ട്രുമെന്റ് ഡിസ്പ്ലേയാണ് പുതിയ പതിപ്പിന്റെ പ്രധാന ആകര്‍ഷണം. നിലവിലുള്ള പതിപ്പുകളിലെ ഡിജിറ്റല്‍ കണ്‍സോളിന് പകരമായാണ് പുതിയ ഡിസ്പ്ലേ നല്‍കിയിരിക്കുന്നത്. ബ്ലൂടൂത്ത് കണക്റ്റിവിറ്റിയോടൊപ്പം ടേണ്‍-ബൈ-ടേണ്‍ നാവിഗേഷന്‍, ഇന്‍കമിംഗ് കോള്‍, എസ്എംഎസ് അലര്‍ട്ടുകള്‍, മ്യൂസിക് കണ്‍ട്രോള്‍ തുടങ്ങി സ്മാര്‍ട്ട്ഫോണ്‍ ലിങ്ക്ഡ് ഫംഗ്ഷനുകള്‍ ഈ സ്‌ക്രീന്‍ സപ്പോര്‍ട്ട് ചെയ്യും.
ടയര്‍ പ്രഷര്‍ മോണിറ്ററിംഗ് സിസ്റ്റമാണ് (ടിപിഎംഎസ്) മറ്റൊരു പ്രധാന സവിശേഷത. ടയറുകളിലെ വായുമര്‍ദ്ദം തത്സമയം നിരീക്ഷിച്ച് ആവശ്യമായ മുന്നറിയിപ്പുകള്‍ ഡിസ്പ്ലേ ചെയ്യും. സ്പോര്ട്ടി 125 സിസി മോട്ടോര്‍സൈക്കിള്‍ സെഗ്മെന്റില് ഈ ഫീച്ചര്‍ ആദ്യമായാണ് അവതരിപ്പിക്കുന്നതെന്ന് ഹീറോ അവകാശപ്പെടുന്നു. പേള്‍ റെഡ് ആക്‌സന്റുകള്‍ സഹിതം മിഡ്‌നൈറ്റ് ബ്ലാക്ക് ഫിനിഷിലാണ് ഹീറോ എക്സ്ട്രീം 125R സ്റ്റെല്‍ത്ത് എഡിഷന്‍ വരുന്നത്. അലോയ് വീലുകളും പേള്‍ റെഡ് നിറത്തിലാണ്. ഇത് ബൈക്കിന് കൂടുതല്‍ സ്പോര്ട്ടി ലുക്ക് നല്‍കുന്നു.
മെക്കാനിക്കല്‍ വിഭാഗത്തില്‍ മാറ്റങ്ങളില്ല. 124.7 സിസി, എയര്‍ കൂള്‍ഡ്, സിംഗിള്‍ സിലിണ്ടര്‍ എന്‍ജിന്‍ കരുത്തേകും. ഈ മോട്ടോര്‍ 11.4 ബിഎച്ച്പി കരുത്തും 10.5 എന്‍എം ടോര്‍ക്കുമാണ് ഉല്‍പ്പാദിപ്പിക്കുന്നത്. 5 സ്പീഡ് ഗിയര്‍ബോക്‌സ് ചേര്‍ത്തുവെച്ചു. ഡുവല്‍ ചാനല്‍ എബിഎസ് കൂടാതെ റെയിന്‍, റോഡ്, സ്‌പോര്‍ട്ട് എന്നീ മൂന്ന് റൈഡിംഗ് മോഡുകള്‍, ക്രൂസ് കണ്‍ട്രോള്‍ തുടങ്ങിയ ഫീച്ചറുകള്‍ പുതിയ പതിപ്പിലും ഉണ്ട്.
സ്പോര്ട്ടി 125 സിസി സെഗ്മെന്റില് ടിവിഎസ് റെയ്ഡര്‍ 125, ഹോണ്ട സിബി125 ഹോര്‍ണറ്റ് തുടങ്ങിയ ബൈക്കുകളുമായാണ് മത്സരം. എക്സ്ട്രീം 125R മോട്ടോര്‍സൈക്കിളില്‍ കൂടുതല്‍ പ്രീമിയം സാങ്കേതികവിദ്യകള്‍ അവതരിപ്പിക്കുന്നതിലൂടെ 125 സിസി സെഗ്മെന്റിലെ സാന്നിധ്യം ശക്തിപ്പെടുത്തുകയാണ് ഹീറോ മോട്ടോകോര്‍പ്പ്.